Texto nahuatl
Copia de otro manuscrito q[ue] fue del caballero
Boturini, y q[ue] el escribio de su puño.
{F. 1r}
{1} Ynic centlamantli topan timotlahtoliz tlatohuanie, tictotlatlauhtilia
in totlahtocauh emperador in tlahtocayotl in nican Tetzicotzinco, canel
tinotlazohtatzin in tinezahualcoyotzin in nehuatl nixochpantzin canel
nimoezotzin in impampa in mopilhuantzitzin in xochimanque in motlacatzitzinhuan
in chichimeca pipiltin in oncan cate tochminque, mazaminque, cihminque in
motetlayecolticatzitzinhuan in xochimanque ma tepitzin xitechmonemactili in
atzintli in conizque in mopilhuantzitzin ma tlacahua in motlazoyollotzin.
{2} Niman quilhui in Xochpantzin. macamo ximotequipachocan ca oncan ca in
anmonemac anconizque in atzintli ma monechicocan in chichimeca in conanatihue
in atl moloni ca ompa in Eloxochitla quiza canel ompa ca moxic
anquihualhuicazque auh yeze, ca anmoezzotica anquitlanizque inic
anquihualhuicazque inic anquihualyacanazque anmoçiahuiliztica in ancaxitiquihue
inic antlatequipanozque in oncan nochantzinco Tetzcotzinco.
{3} Ye niman quinhuicac in Nezahualcoyotzin in ompa Yeloxochitla ompa moch
quimittiti in Xochpantzin in tetepeme, ihuan quilhui: nopiltzine ca ye nican in
toctoc moxic ma xicmohuiquili in atl, ca ye motlatquitzin, auh ma xicmati in
tla annemizque ca yehuantin inin tetepeme in nimitznemactia inic centetl
yehuatl in Quetzaltepetl canel oncan ca in Quetzalcohuatl in compixtaz in
amaltepeuh inic anmochihuazque in Nezahualpiltzintli,
{4} Auh inic ome yehuatl in otlatl itic mochi inic huilantica quauhtlahtli,
{5} auh inic yei yehuatl in quauhyacatl mochi inic huilantica tepetl inic
cuitlalpitica apamitl, ihuan in tzinacan oztoc ye hualla melahua Tezontla,
ihuan Yxayoc niman ayac huel quimotlatquitiz ca no tlahtocatlatqui canel oncan
anmechtequipanozque in ixquixtin nopilhuantzitzintin in ompa cate in
tlatocaaltepetl Tetzcoco.
{6} Auh inic nahui yehuatl in anmotla^tocaaltepeuh Tetzcotzinco oncan moch
toctoc in quetzaliztli in chalchiuhmaquiztli, canel anmotlahtocachan in oncan
nochantzinco Quetzalitzcalco ca oncan tentoc in coztic teocuitlatl canel
anmochimal anmomaquauh yez.
{7} Auh yn atzintli conizque in nopilhuantzitzin in ompa notlahtocaaltepeuh
yehuatl in otlatl ihtec hualehua, ihuan in telpoch atl, ihuan in quauhtlahtli
ic quintequipanozque in cihuapipiltin canel intlatqui.
{8} Auh in Quauhpechco moloni atl ayac quimotlatquitiz, ca cemihcac
hualyatiaz in oncan notlahtocanezehuiayan Tezonyocan, in quauhyacatl iquechpa,
oncan ic tlatequipanoloz cemicac quihualtocatiaz in apamitl in icuitlalpitic
altepetl nicahuilia, nicnemactia in Tlachpopocatzin Tezontla conizque in
ypilhuan, ihuan ic mopalehuizque, ic motequipanozque ca niman ayac huel
quincuiliz ca intlatqui, ca in ciyahuiliztica in oquihualyacanque.
{9} Auh ma zanen anquixicauhti inin amaltepeuh, ihuan in ixquich quauhtlatli
auh in Quetzaltepetl iyayo tepitzin quimitlania in Huexotla Tlazolyahuitl,
ihuan in Maxihuitl, auh in iquac in anquinequizque anconanazque canel anmauh,
ca anmotlatqui.
Auh niman quihualyacanque in atl in Nezahualcoyotzin,
ihuan in Xochpantzin, ihuan in ytlacahuan quiquixtico Xolotepan ic niman itech
in Chiconquiauh ic huala melauh itech in Tetecatl niman ic acico in oncan itech
in Tetzcotzinco niman ichan calaquico in atl in Xochpantzin,
{10} Auh niman quimilhui auh in atl Zacaxochitla in hualehua Yeloxochiatl
inic cuitlalpitica in Tetzcuctzinco ca itlatqui in Xochpantzin in inamictzin
cihuapilli Xiloxochiquetzaltzin, ihuan in ytelpoch Quetzalmacuixe
tlahtocapilli.
{F.1v}
{11} Auh niman quimilhui: manen anquixicauhti in anmaltepeuh, auh in
Quauhtlatzacuilotzin, ca amo itlah itech motlahtoltiz nican, canel
mooquimonequilti hualmohuicaz onicnonochili, ca ye mopaquiltitica, auh in
Quetzaltepetl iyayo tepitzin quimihtlania in Huexotla in Tlazolyahuitl, ihuan
in Maxihuitl auh in iquac anquinequizque anconanazque, canel anmauh, canel
anmotlahtocatlatqui.
{12} Auh in tlaqualyotica yezque in ympilhuan in Maxihuitl, ihuan in
Tlazolyahuitl anquincahuilizque, auh tlacuecuenotizque quin in iquac yez
anquinquixtilizque ca zan ixquich in niquitohua in notlahtocatlanahuatil.
{13} Auh in itech tepetl Tetzcotzinco oncan quiquixtique in ixiptla in
yuhqui catca in ixayac, ihuan in itlac itech tetl in yuhqui quetzalcuetlachtli
ipan quiquixtique in ytoltecahuan, inic yquiteicuiloque itencopa in
Nezahualcoyotzin inic ca monezcayoti inic oncan quittazque in ypilhuan in
yxhuihuan, ihuan in yxquich tlacatl.
{14} Auh in tla^tocat Nezahualcoyotzin ompohualli xihuitl ipan ce xihuitl,
auh in mochi ic nenca yehpohualli xihuitl ipan matlacxihuitl once.
{15} Auh in tlatocat Nezahualpiltzintli ompohualli xihuitl, ihuan nahui
xihuitl inic onen inic otlahtocat in nican ciudad Tetzcoco.
{16} Auh in Quauhpechcotlaca quinmotequipanilhuizque in nopilhuantzitzin
Tetzcoco.
{17} Auh in Tequanolcotlaca ymacehualhuan in Nezahualcoyotzin inic ce itoca
Xochitonal ynic ome itoca Quacoz.
{18} Auh in Amanalcotlaca notetequipanocahuan ichcacchiuhque.
{19} Auh in Xochpantzin motlahtocatili oxihuitl, ihuan in motla^tocatili in
Atlihtec.
Nohpaltitlan Chalchiuhtequancoloapan Mexico
nauhxihuitl comopatili in Tzontecochatzin.
{20} Ye yuh caxtolli tonatiuh tlapohua metztli agusto ipan xihuitl de 1535
ihquac hualla virrey yancuica Don Antonio de Mendoza, ihuan in iquac macoya tlacalaquili
nahui tomin iquac tlatocatic Don Antonio Pimentel, ihuan iquac tetlalmacoc
temacoc tlalquahuitl in cehcen altepetl tlahtoque in intlal huel yancuican peuh
ompa Tetzcotzinco ipan alcalde mayor tlaxcaltecatl Ytzcuinquani alcalde
ordinario Don Pedro Tetlahuehuetzquititzin, escribano Don Jorge Yohyontzin ipan
lunes ic nahuilhuitl tlapohua metztli henero, ihuan ipan guardian fray Juan de
Lameda yehuatl itencopa in moxexelo tlalli yancuican motlali comonidad in
ciudad Tetzcoco motlahtocatilia in tlacpac omoteneuhtzino Don Antonio Pimentel
governador ipan xihuitl 1537.
{21} r. Don Antonio Pimentel governador, ihuan mochi tlacatl in ipan
tlahtocayotl Tetzcoco icatzinco rey nuestro señor, ihuan in tehuantin axcan
macoh in intlalnemac in Tetzcotzincotlaca Santa Maria Nativitas yaltepetzin
niman ayac huel quincuiliz in intlal ca ipan tlacalaquizque canel
oquinmonemactili in Dios, ihuan in rey, ayac huel oncan tlahtoz ce
caxtiltecatl, nozo aca occe tlacatl itla quincuiliz in innemac in atl, in
Yeloxochitla hualehua ihuan tlalli, in ompa acitica quaxochtli, ihuan
tlalquahuitl huel huei pena quixtililoz namo yaloz nozo tetocoz quimomachiltiz
in virrey in tohuei tlahtocatzin eccelentísimo señor matlacpohualli pesos
quixtlahuaz, canel ic quimotequipanilhuia in tohuey tlatocatzin rey,
{22} auh ompa onacitica in quaxochtli in ipan ahuehuetl Acoliuhyan, auh inic
patlahuac ipan in tochatlauhtli, auh inic xopiltic oputeticpac, (asi escribio
Boturini, yo leo xopuztecqui) acitica canel innemac ca in intla^tocatlal inic
omoteneuhque tlacpac. Tixpan omochiuh in tehuantin nican
{F. 2r}
tictlalia in totoca.
Don Antonio Pimentel governador
Don Pedro Tetlahuehuetzquititzin alcalde ordinario
Don Jorge Yoyotzin escribano.
{23} r. Nican momachiotia in intlatequipanoliz inic omochiuh in
itlazomahuizcaltzin in Dios ytlazomahuiznantzin Santa Maria Nativitas, yehica
ca ayac ce caxtiltecatl oncan omohuenti ca zan huel oquimixcahuique mochintin
in macehualtin in ypilhuantzitzin in tlatocacihuapilli in axcan motenehuazque.
{24} Auh in i^quac mononotzque in mochintin ipan itlazomahuizilhuitzin in
cemicac ychpochtzin Santa Maria Nativitas in quichihuazque in
ytlazomahuizcaltzin ayac oquincuitlahuilti zan oquinmolnamictili in Dios
Espiritu Santo in huehuetque, ihuan in innamichuan ihuan in ynpilhuan mochintin
oncan oquinnehtoltique inic mochihuaz in ytlazomahuizcaltzin in Dios ynantzin,
{25} auh ompa canato in Azcapotzalco in maestro in oquichiuh in teocalli
ipantzinco guardian fray Francisco Rodríguez temachtiani fray Andres Gallo,
presidente fray Pedro de la Parra, auh in maestro mayor Don Juan de Galicia,
auh inic manato cempohualli pesos, momacato zan itlaqual mochiuh ipan xihuitl
momachiotia de 1537.
{26} Auh nican motenehuazque in huehuetque.
Don Bernardino de Andrada = Don Juan Baptista
mayordomo = Augustin de Galicia = Don Esteban Mendez = Don Miguel de Castro =
Miguel de Caravajal = Benito de San Juan = Juan Baptista de San Antonio = Pedro
Antonio Tochihuitl. = Don Jacob de mi Dios = Don Rafael del Cielo.= Simon de
San Fabian.
{27} Auh in mochi in itlaxtlahuil momacac cepa caxtolpohualli pesos, auh in
iquac otlan teocalli yepohualli pesos, auh amo pouhqui in ixquich inic
omotlazotlac, auh in iquac oyecauh in ytlazocaltzin in Dios ynantzin yexihuitl
in huel chicahuac in otequitihuac, auh in iquac otlayecauh za no yehuatzin
oquimoteochihuilli in guardian in omoteneuhtzino tlacpac, auh in opopoliuh
tomines centzontli pesos ipan caxtolpohualli, ihuan yepohualli pesos, yhuan ce,
ihuan melio ipan xihuitl de 1539.
{28} r. Nota que puso Boturini al fin de esta copia hecha toda de su puño.
“Esta es una copia sacada de otra copia que esta en
poder del pueblo de Nuestra Señora de Nativitas del Monte media legua distante
de Tetzcuco, la qual está en papel antiguo y aunque no sea original, no
obstante se conoce que es fidedigna, y está enbuelta en un papel grueso que los
indios llaman tlalamatl.”
{29} Anotación en la portada del
manuscrito de Santa María Nativitas: “Copia simple del documento de la propiedad de tierras, monte y agua del
pueblo de Santa María Nativitas escrito en mexicano en el año 1537 años”
Joaquín Ramos mayo 22 de 1881.
{30} Axcan ipan in jueves ye ic cempouhali
ihuan chicuacen tonali tlapoa metztli agosto ipan xihuitl de mil setecientos y
seis años omonemactihque yn altepeamatl in tepilhuan Santa Maria Nativitas
chaneque ca oquimotemactili in tlatoqui D. Francisco de Galves alcalde mayor
in nican ipan in tlatocaaltepetl ciudad Tetzcoco ycatzinco in rey nuestro.
{31} Ihuan mochi in itlatititzal inin amatl oquimopialtilique in Juan
Baltazar in mochiuh tatzintli mochiuhtzinoa aic aca quimotlatquitiz
quimoaxcatiz inin amatl ca zan mania yeica, ca ipalehuiloca in altepetl Santa
Maria Nativitas ca zan pahca yocoxtica mopiaz ca tel neztica yn iuhqui
tlatlalili ihuan in iuhqui oquimohtilique in tlatoque oquimoneltlalilique inic
ayac quemanian acah tecamocayahuaz in zazo aquin in ipan in yomoteneuh altepetl
Santa Maria Nativitas.
{32} Au{h} inic neltiliztli, ca nican motoca icuilohtzinohua in tlatoani
señor alcalde mayor ihuan in tlaneltilianime, yn iuh nezi ipan inin altepeamatl
yhuan inehuatl no yuhqui ninahuatlatoltlatenquixtiani in ipa nica
tlahtocaaltepetl ciudad Tetzcoco axcan ipan xihuitl metztli tonali.
Andres de los Santos
{33} Es copia sacado del original que se
haya de donde es propiedad, Tezuyoca mayo 22 de 1881. Joaquin Ramos {rúbrica}.
